PSD2ri buruz jakin behar duzun guztia
Ordainketei buruzko Europako araudi berriaren inguruan jakin beharreko guztia zeure esku jarri dugu.
Partikularrek egin ohi dituzten galderak
Zer da PSD2? ×+
PSD2 edo ‘Ordaintzeko Zerbitzuei buruzko Bigarren Zuzentaraua’ online egindako ordainketetan segurtasuna handitzeko Europako araudia da, betiere kontsumitzailearen mesedetan. Aipatutako zerbitzu honetan, herrialdeen eta hornitzaileen arteko berrikuntza eta lehiakortasuna sustatzen dira, Europako Batasunean ordainketa-merkatu osatu eta eraginkorragoa sortzeko lagungarria izango delakoan.
Zergatik jarri dira indarrean neurri horiek? ×+
Jarraian azaldutako oinarrizko helburu hauek bermatzeko:
- Berrikuntza sustatzea, sartzeko mugak gutxituz eta lehiakortasuna handituz.
- Kontsumitzaile gisa daukazun babesa sendotzea: bezeroarekiko gardentasuna handituz eta komisio, errekargu eta erantzunkizunak mugatuz.
- Ordainketen segurtasuna hobetzea, benetakotzeko eskakizun berriak jarriz, ekonomia digitalak aurrera jotzeko ezinbesteko baldintza dena.
- Ordainketei buruzko Europako gunea sendotzea. Horretarako, araudiak bateratuko dira, salerosketaren herrialdea edozein izanik ere, erabiltzaileak jarraitutako prozedura parekoa izateko asmoz.
Zer da, zehatz-mehatz, bezeroen benetakotze indartua? ×+
Bezeroen Benetakotze Sendoa (“Strong Customer Authentication” ingelesez “SCA” siglekin), Ordainketei buruzko Europako araudi berriaren oinarrizko osagaia da eta haren ondorioz segurtasun arloko neurri berriak ezarriko dira, etorkizunean salerosketak ziurragoak izateko. Izan ere, saltegietan aurrez aurreko ordainketak egiterakoan edo internetez erosterakoan eta Online Bankako eta Banka Mugikorreko hainbat eragiketa egiterakoan identifikatzeko erabiliko dugun modua horixe izango da.
Bere helburua iruzurren aurka bezeroak babestea da. Horretarako, benetakotzeko maila berriak eskatzen ditu, online ordainketa edo salerosketa jakin bat benetan bezero jakin batengandik datorrela egiaztatzeko.
Hala, online zenbait ordainketa eta eragiketa egiten dituzunean, benetakotzeko dauden 3 moduetako 2 eskatuko dizkizugu:
- Ezagutza: dakizun zerbait, pasahitz bat.
- Edukitzea: daukazun zerbait, esate baterako, Smartphonera bidalitako erabilera bakarreko pasahitza edo ordaintzeko txartel bat.
- Inherentzia edo atxikipena: zeu "zarena", adibidez, aurpegiaren ezagutza edo hatz-marka bezalako elementu biometrikoak.
Neurri berri horiek, ordaintzerakoan konfiantza eta babes handiagoa emateko prestatu dira.
Nolako ondorioak ekarriko dizkit benetakotze indartuak? ×+
2019ko irailean zenbait aldaketa nabarmenduko dituzu salerosteko moduan:
- Dendetan: Denda edo merkataritza-guneetan Contactless sistemaren bidez ordaintzean, PIN zenbakia sartzea gehiagotan eskatzeko aukera dago, diru-kopuru txikiak izanda ere.
- Interneten: Online erosiko duzunean, ez dizugu eskatuko soilik txartel-zenbakia eta iraungitze-data sartzea. Horiez gain, benetakotzeko aurretik aipatutako 3 moduetako 2 eskatuko dizkizugu.
- Online Bankan eta Banka Mugikorrean: PSD2 abian jartzearen ondorioz, ez duzu koordenatuen txartela (TPC) eduki behar izango. Nahikoa izango da mugikorra soinean eramatea eragiketak izenpetzeko. Askoz erosoagoa eta betiko segurtasun berarekin.
Salerosketa hauek izenpetzeko erabilera bakarreko gakoa eskatuko dizugu, SMS bidez une horrexetan zuri bidalitakoa. Are errazagoa da oraindik; batzuetan, nahikoa izango zaizu Online Bankara eta Banka mugikorrera sartzeko gakoak ipintzea. Aurrekoaz gain, konfiantzazko onuradunak esleitu eta kudeatu ahal izango dituzu transferentzia egitean edo Onuradunen Agenda berritik.
Batzuetan, SMSen bitartez igorritako erabilera bakarreko gakoa eskatu ahal izango dizugu, Online Bankara / Banka Mugikorrera sartzean edo isilean eduki beharreko informazioari zein ordainketen historikoari buruzko galderetan zure pribatutasuna babesteko asmoz.
Nola eragiten dio benetakotze indartuak online-merkataritzari? ×+
Segurtasunerako eta benetakotzeko neurri berriak 2019ko irailaren 14an hasi ziren ezartzen saltoki fisikoetan eta gure Online Bankan nahiz Banka Mugikorrean. Baina online-erosketak egiteko datozen hilabeteetan pixkanaka hasiko dira ezartzen, 2021eko urtarrilean behin betiko ezarrita egon arte. Eta eskatuko dizkizugun benetakotzeko moduak ez dira aurrez aurreko erosketak egiteko erabiltzen diren berberak izango. Online erosiko duzunean, ez dizugu eskatuko soilik txartel-zenbakia eta iraungitze-data sartzea. Horien ordez, benetakotzeko dauden 3 moduetako 2 eskatuko dizkizugu:
- Ezagutzea: Dakizun zerbait, hala nola banku elektronikora sartzeko pasahitza, edo txartelaren PIN zenbakiaren posizio jakin batzuk.
- Jabetza: Daukazun zerbait, adibidez, smartphoneari lotutako gure aplikazioa, edo SMS bidez bidaltzen dizkizugun erabilera bakarreko pasahitzak jasotzeko daukazun mugikorra.
- Inherentzia: zeu "zarena", adibidez, aurpegiaren ezagutza edo hatz-marka bezalako elementu biometrikoak.
Benetakotzeko modu berri horiek, ordaintzerakoan, konfiantza eta babes handiagoa emateko prestatu dira.
Zeintzuk dira zehazki benetakotzeko eskatuko dizkidazuen moduak online erosketak egiteko? ×+
Gure bezero guztiek online erosteko modu berri horretaz baliatu ahal izatea nahi dugu. Horregatik, zure ustez erosoenak eta errazenak diren benetakotzeko moduak eskatuko dizkizuegu, teknologiaren erabilerari eta gurekin harremanetan jartzeko moduari dagokienez dituzuen lehentasunen arabera.
Banka mugikorreko aplikazioa baduzu eta bertan zure smartphonea egiaztatu baduzu, online-erosketa bat egin behar duzunean, gailu horretan jakinarazpen bat jasoko duzu eta bertatik identifikatu ahal izango duzu zure burua gure aplikazioan, ordainketa berretsi ahal izateko. Zure smartphoneak biometriaren aukera baldin badauka, zure hatz-marka edo beste elementu biometriko bat sartzea eskatuko dizu, identifikatzeari begira. Biometriarik ez badukazu, Online Bankara sartzeko gakoa eskatuko dizu.
Gure aplikazioa baduzu baina zure smartphonea egiaztatu ez baduzu, biometria edo online bankara sartzeko gakoa sartu ondoren, une horretan SMS bidez bidaliko dizugun erabilera bakarreko kodea sartzeko eskatuko dizu.
Gure aplikazioa jaitsita ez baduzu, online-merkataritzan ordainketa egitera zoazenean, zure erabiltzailearekin eta gakoarekin sartu beharko duzu gure online bankara edo banku mugikorrera, eta ordaintzeke duzun ordainketa hori baimendu beharko duzu, une horretan SMS bidez bidaliko dizugun erabilera bakarraren kodea sartuta.
Gure online banka-zerbitzurik ez baduzu, merkataritza elektronikoan ordainketa egin behar duzunean SMS bat jasoko duzu eta, bertan, zure txartelaren PIN zenbakiaren bi posizio biderkatzeko eta horren emaitza saltokiko pantailan sartzeko eskatuko dizugu eta, horren ondoren, erabilera bakarreko kode bat, SMS mezuan ere txertatuko duguna.
Garrantzitsua da banka mugikorreko aplikazioa edukitzea? ×+
Benetakotzeko lehen aipatu ditugun modu guztiak seguruak dira, baina gure aplikazioaren azken bertsioa jaitsita badaukazu eta smartphonea bertan egiaztatzen baduzu, erosketak errazago, erosoago eta azkarrago egin ahal izango dituzu.
Zure gailuetako denda ofizialetan jaits dezakezu gure app-a. Zure smarthonea app-ean egiaztatzeko, une horretan emango dizkizugun argibideei jarraitu besterik ez duzu egin behar.
Nola egiaztatuko dut nire smartphonea Kutxabanken app-ean? ×+
Kutxabanken app-a ez badaukazu: Instalatu aplikazioa eta, banka mugikorrera sartzean, zure gailua bertan egiaztatu ahal izateko gidatuko zaitugu. Horrela, aplikaziotik ordaintzeko modurik erosoen eta seguruenean baimena eman ahal izango duzu.
App-a instalatuta baduzu: Sartu banku mugikorrean eta “Nire datuak” atalean zure ohiko gailua egiaztatzeko aukera aurkituko duzu. Bete jarraibideak eta lotu aplikazioa zure ohiko gailu mugikorrari. Horrela, online-erosketak modu eroso eta seguruan baimendu ahal izango dituzu. Gogoratu gailuz aldatuz gero prozesua errepikatu behar izango duzula gailu berria app-an egiaztatzeko.
Eta beste zerbait egin behar dut segurtasun arloko neurri berriek ezarri ahal izateko? ×+
Mugikorraren zenbakia eguneratuta edukitzea garrantzitsua da, erabilera bakarreko kodeak SMS bidez bidaltzeko aukera edukitzeko, hala behar izatekotan.
Edozein kutxazainetan edo bulegotan egunera dezakezu zure telefono-zenbakia. Online Bankako gure zerbitzua ezarrita ez badaukazu, alta egin dezakezu gure webgunetik edo zeure bulegoan.
Baina orain arte egin ditudan ordainketak ez al dira ziurrak izan? ×+
Bai, baziren ziurrak, baina gailu berrien bitartez egindako ordainketak ugaltzearen ondorioz eta ordaintzeko modu berriak sortu direnez gero, Europako Batasunak segurtasun neurri berriak hartu behar izan ditu teknologia berrietan gero eta barneratuago dagoen merkatu honetan kontsumitzaileek izan lezaketen konfiantza handitzeko.
Segurtasun arloko neurri berrien multzo hori, PSD2 deritzon Ordaintzeko Zerbitzuei buruzko Zuzentarau berriaren bidez ezarri da eta ordaintzeko zerbitzu-hornitzaile guztiok (esaterako bankuok) bete beharreko araudia da, Europako Esparru Ekonomikoaren barruan.
Ordainketak egiteko noiz hasiko zarete SCA eskatzen? ×+
Ziurrenik, aurrez aurreko erosketetan dagoeneko nabaritzen hasi zara, PIN zenbakia maizago eskatzen dizugunetan, bai eta Online Bankako eta Banka Mugikorreko zenbaitetan sartzean eta kontsultak egitean ere, izan ere, horietan SMS mezu batean bidalitako erabilera bakarreko kode bat eskatu ahal izango dizugu.
Online-erosketei dagokienez, hurrengo hilabeteetan hasiko gara, pixkanaka, hala egiten, 2021eko urtarrilean behin betiko ezarrita egon arte.
Orduan, beti eskatuko didazue SCA? ×+
Ez, eragiketa askotan ez dizugu SCA eskatuko.
Alde batetik, hainbat ordainketa-motatan, izatez, ez da eskatzen benetakotze sendoaren baldintza PSD2 araudian. Hala gertatzen da, esate baterako, posta edo telefono bidezko salmentetan, edo hainbat produktu zein zerbitzutan egiten diren harpidetzetan (adibidez, multimedia edukia duten plataformak).
Gainera, PSD2 araudiari esker eta eragiketa hori arrisku txikikoa bada, normalean SCA eskatuko luketen salerosketen benetakotzea ez da behar izango.
Eta atzerrian erosten baduzu? ×+
Gainera, Europako Esparru Ekonomikotik kanpoko saltegietan egindako ordainketetan ez da benetakotze sendoa eskatzen. Hori dela eta, saltzaile berak kobratzeko hainbat modu eduki ditzake bere webgunea Europan edo Europatik kanpo atzitzearen arabera.
Badaukat babes txikiagoa PIN zenbakia sartzea edo interneten bidezko erosketa benetakotzeko bi faktore ematea eskatzen ez didazuenean? ×+
Ez, txartelarekin edozein ordainketa egitean beti egongo zara babestuta, izan ere, aurrez aurreko erosketak egitean, ez dizkizugu PIN zenbakia edo benetakotzeko 2 faktoreak eskatuko, beste bide batzuen bitartez hori egitea beharrezkoa ez dela ikusi badugu.
Beste bankuen txartelekin modu berean egingo da? ×+
Europako Esparru Ekonomikoaren banku guztiak PSD2ri lotuta gaudenez gero, guztiok ezarri behar izango ditugu segurtasun arloko neurri horiek, baina banku bakoitzak erabaki ahal izango du bere bezeroei eskatuko dizkien benetakotzeko moduak; beraz, litekeena da erosteko bestelako prozedura jarraitzea ordaintzeko erabiltzen duzun txartela jaulki duen bankuaren arabera.
Neuri buruzko informazioa ziurtasunez gordeta egongo da? ×+
Neurri guzti horiek, bezero gisa, zuri babes handiagoa eskaintzeko asmoz ezarri dira. Zuri buruzko informazioa helarazteko, kode zifratuko goi-maila erabiltzen dugu eta zerbitzari ziur batean biltegiratuta geratzen da. Babesteko beste maila gehigarri horrekin, Interneten eta dendetan ordaintzeko modua aldatu da.
Zerbait egin behar dut? ×+
Segurtasun arloko neurri berri horrek sartzeko kodea bidaltzea eskatzen duenez gero, garrantzitsua da benetakotzeko faktoreak zuri eskatzeko zein zeuk geuri modu seguruan bidaltzeko komunikazio-kanala edukitzea. Hori dela eta, zure datuak eguneratuta ditugula ziurtatu behar duzu, batik bat, mugikorraren zenbakia. Kutxabanken edozein bulego edo kutxazainetan egin dezakezu.
Saltegietatik egin ohi diren galderak
Zer da PSD2? ×+
PSD2 edo ‘Ordaintzeko Zerbitzuei buruzko Bigarren Zuzentaraua’ online egindako ordainketetan segurtasuna handitzeko Europako araudia da, betiere kontsumitzailearen mesedetan. Aipatutako zerbitzu honetan, herrialdeen eta hornitzaileen arteko berrikuntza eta lehiakortasuna sustatzen dira, Europako Batasunean ordainketa-merkatu osatu eta eraginkorragoa sortzeko lagungarria izango delakoan.
Zergatik jarri dira indarrean neurri horiek? ×+
Jarraian azaldutako oinarrizko helburu hauek bermatzeko:
- Berrikuntza sustatzea, sartzeko mugak gutxituz eta lehiakortasuna handituz.
- Kontsumitzaile gisa daukazun babesa sendotzea: bezeroarekiko gardentasuna handituz eta komisio, errekargu eta erantzunkizunak mugatuz.
- Ordainketen segurtasuna hobetzea, benetakotzeko eskakizun berriak jarriz, ekonomia digitalak aurrera jotzeko ezinbesteko baldintza dena.
- Ordainketei buruzko Europako gunea sendotzea. Horretarako, araudiak bateratuko dira, salerosketaren herrialdea edozein izanik ere, erabiltzaileak jarraitutako prozedura parekoa izateko asmoz.
Zer da zehazki Bezeroen Egiaztatze Indartua (SCA)? ×+
Bezeroen Egiaztatze Indartua, «Strong Customer Authentication» edo SCA ingelesez, hainbat segurtasun-neurriren aplikazioan datza. Neurri horiei esker, txartel bidezko ordainketak are seguruagoak izango dira, banku jaulkitzaileek txartelen titularrak identifikatzeko erabiliko duten modua izango baita, aurrez aurreko edo internet bidezko ordainketak agintzen dituztenean.
Segurtasun-neurri berri hauek 2019ko irailaren 14tik aurrera aplikatzen hasi ziren aurrez aurreko erosketetan. Online erosketetan datozen hiletan hasiko dira aplikatzen, 2021eko urtarrilean erabateko zabalpena lortu arte. Zure bezeroei nortasuna egiaztatzeko eskatuko dizkiegun faktoreak ez dira aurrez aurreko erosketetan erabiltzen direnak izango.
Nola eragiten dio horrek nire saltokian egiten diren ordainketei? ×+
Gaur egun, saltoki seguruetan identifikatzeko, honako datu hauek sartzeko eskatzen zaio bezeroari: txartelaren zenbakia, iraungitze-data, CVVa eta sms bidez mugikorrera bidalitako 6 digituko OTP gakoa.
SCA beharrezkoa izango den unetik aurrera, bezero batek zure saltoki birtualean erosten duenean, txartelaren zenbakia eta iraungitze-data sartzeko eskatuko diozu, baina horrez gain, erosketa egiteko darabilen txartelaren banku jaulkitzaileak 3 egiaztatze-faktore hauetako 2 eskatuko dizkio:
- Ezagutza: berak dakien zarbait; esate baterako, banku elektronikora sartzeko pasahitza edo bere txartelaren pin zenbakiaren zenbait posizio.
- Jabetza: berak daukan zerbait; esate baterako, bere smartphonearekin lotuta dagoen bankuaren aplikazioa edo SMS bidez bidaltzen dizkiogun erabilera bakarreko pasahitzak.
- Izana: baden zerbait; esate baterako, osagai biometrikoak, hala nola aurpegiaren ezagutza edo hatz-marka.
Zeintzuk dira zehazki eskatuko diren egiaztatze-faktoreak? ×+
Banku jaulkitzailea garen aldetik, gure txartelen titular diren bezeroei errazen eta erosoen zaizkien egiaztatze-faktoreak eskatuko dizkiegu, eta teknologia erabiltzeko orduan dituzten lehentasunetara eta gurekin harremanak izateko erabiltzen dituzten moduetara egokituko gara.
Hala ere, ez ditugu beti egiaztatze-faktore berdinak eskatuko; bezeroak online erosketa egiteko erabiltzen duen gailuaren araberakoa izango da eskaera.
Horrez gain, kontuan hartu behar dugu Europako Esparru Ekonomikoko banku guztiok PSD2 bete behar dugula, eta, beraz, denok aplikatu behar ditugula segurtasun-neurri hauek, baina banku bakoitzak erabakiko du bezeroei zein egiaztatze-faktore eskatu. Horrenbestez, baliteke bezero batek zure saltokian daukan erosketa-esperientzia desberdina izatea, ordaintzeko erabiltzen duen txartelaren banku jaulkitzailea bata ala bestea izan.
Eta horren ondorioz ez al du bertan behera utzitako erosketen kopuruak gora egingo? ×+
Ez. Banku guztiak lanean ari gara prozesua ahalik eta hurbilena eta errazena izan dadin, eta, gainera txartelen titularrentzako informazio-kanpainak egiten ari gara, eskatuko dizkiegun egiaztatze-faktoreak zeintzuk izango diren jakin dezaten, SCA derrigorrezkoa izan aurretik. Horrez gain, gure bezeroak animatzen ari gara zenbait ekintza egin ditzaten, hala nola gure aplikazioa deskargatzea edo gure banku elektronikoan alta ematea, haien erosketa-esperientzia erosoagoa eta arinagoa izan dadin.
Bestetik, lege-salbuespen batzuk daudela hartu behar dugu kontuan, eta, horien ondorioz, bi egiaztatze-faktoreak ez lirateke beti eskatu behar. Horrenbestez, erabiltzailearen esperientzia hobetu daiteke, ordainketaren segurtasunari muzin egin gabe.
Hainbat ordainketa mota daude, bere izaeraren ondorioz, PSD2k egiaztatze indartuaren neurrietatik kanpo uzten dituena:
- Aurreordainketa bidezko txartel anonimoekin egindako ordainketak; anonimoak direnez, ezinezkoa da titularraren nortasuna egiaztatzea.
- MIT izeneko transakzioak («Merchant Initiated Transactions»): Araudiak eskatzen du agindu-emaileak abiarazitako ordainketa elektronikoei aplikatzea SCA. MIT eragiketa produktu edo zerbitzuen ordainketa mota bat da, eta aurretik saltegiaren eta txartelaren titularraren arteko akordio bat dagoenean aplikatzen da. Akordio horren ondorioz, saltokiak kasuan kasuko zordunketak egin ditzake, eta titularrak ez du horiek abiarazteko ezer egin behar. Lehenengo erosketan SCA beharrezkoa izango da, baina ez ondorengoetan (esate baterako, harpidetzen edo horniduren ordainketa, zordunketa gehigarriak auto baten alokairuan edo hotel baten erreserban…). Txarteletan egiten diren zordunketa-eragiketen modukoak dira.
- MO/TO (Mail Order/Telephone Order) eragiketak, hau da, telefono edo postaz agindutakoak.
- Sare mugatuetan egindako ordainketak.
- Banku jaulkitzailea edo eskuratzailea Europako Esparru Ekonomikotik kanpo dagoenean.
Horrez gain, legeak beste hainbat salbuespen aurreikusten ditu txartelen banku jaulkitzaileek SCA aplikatu ez dezaten, arrisku txikiagoko eragiketak direlako. Hona hemen salbuespen horiek:
- 30 eurotik beherako ordainketak; gehienez 5 eragiketa eta 100 euroko kopuru metatua.
- Eragiketa errepikatuak, zenbateko berekoak eta saltegi berean; lehenengo eragiketan egiaztatzea egin behar da. 2019ko irailaren 14a baino lehen abiarazitako harpidetzak ez dira egiaztu behar izango, aldaketaren bat egiten ez bada.
- Titularraren konfiantzazko saltokietan egindako ordainketak, banku jaulkitzaileari konfiantzazkoak direla jakinarazi bazaio. «Zerrenda zuriak» izena ere ematen zaie.
- Zenbait ordainketa kooperatibo.
- Iruzur arrisku txikia duten ordainketak.
Oro har, bezeroari SCA eskatu aurretik, banku jaulkitzaileok goian azaldutako salbuespenetakoren bat aplikatzen ahaleginduko gara. Horri esker, kasu askotan, erosketa-esperientzia orain artekoa bezalakoa izango da.
Eta nola jakingo dute bankuek noiz eskatu behar duten SCA-a eta noiz salbuespena aplikatu? Saltokiok zerbait egin behar dugu? ×+
Informazioa saltokien eta jaulkitzaileen artean trukatzen da, 3D Secure protokoloari esker.
2001etik, eragiketak informatzeko zein egiaztatzeko erabiltzen den bertsioa 1.0 da, baina gaur egun, protokolo horren bertsio berri bat dago, informazioa hobetzen duena, datu kopuru handiago batekin, eta erosketa prozesuan SCAren bi faktoreak eskatzea zein SCAren salbuespenak aplikatzea ahalbidetzen duena.
Zure saltokiak erabiltzen duen Kutxabank ST birtuala segurua da, hau da, 3D Secure da.
Zure saltokiak Kutxabanken ST Birtual bat edo gehiago baditu, eta datuen kudeaketa delegatuta baduzu, ez duzu protokolo berrirako migrazioarekin kezkatu beharrik, gu arduratzen ari baikara bere bertsioa eguneratzeaz eta migrazio hori egiteaz.
Zure saltokia ez badago aipatutako tipologia horren barruan, seguru dagoeneko harremanetan jarri garela zurekin, eta beharrezko ezarpen tekniko guztiak egiteko laguntza ari gatzaizula ematen; hala ere, zalantzaren bat baduzu, idatzi soportevirtual@redsys.es helbidera edo deitu 902 106 223 telefonora, eta xehetasun gehiago emango dizkizugu.
SCA ez aplikatzea erabaki daiteke, arriskua hartzeko prest gaudelako edo bezeroarekin adostu dugulako? ×+
Ez. Espainiako Bankuak baieztatu du SCA beti aplikatu beharko dela, eragiketa salbuetsita ez badago (esate baterako, EBtik kanpoko mugaz gaindiko eragiketen kasuan) edo legeak aurreikusitako salbuespenen bat aplikatu ezin bada.
Diru-itzulketetan ere SCA aplikatu behar da? ×+
Ez, ez baita ulertzen horiek ordainketa-eragiketak direnik.
Merkataritza elektronikoko eragiketen artean sailkatzen diren saltokien ordainketarako app-en bidez egiten diren eragiketak, merkataritza elektronikoa dira benetan, eroslea aurrez aurre badago? ×+
Bai, internet bidez edo urrutiko komunikaziorako erabil daitekeen gailu baten bitartez abiarazitako eragiketak baitira. Horren barruan egongo dira Internet bidez egindako eragiketak eta mugikorraren bidez egindakoak (internet bidezko erosketetan, ez contactless erosketetan).
Posta elektronikoz edo WhatsApp eta beste mezularitza-aplikazioen bidez agintzen diren eragiketak MO/TO eragiketak direla ulertzen da? ×+
Posta elektronikoz edo mezularitza-aplikazioen bidez bidalitako aginduak MO/TO eragiketen barruan sar daitezke, baina webgune baten bidez emandako aginduak, webgune horretara mezu batean jasotako estekaren bidez sartu bagara, merkataritza elektronikoaren barruan daude eta SCA beharrezkoa da.
Eroslearen esku-hartzearekin, bide automatizatu baten bitartez (Alexa, Siri, Google Assistant eta antzekoak) agintzen diren eragiketak MO/TO eragiketak dira? ×+
Ez. Bezeroak esku hartu ondoren ordainketa abiarazten duena gailu automatizatu bat denean, merkataritza elektronikoko eragiketak direla ulertuko da eta SCA beharrezkoa izango da. Hala ere, agindu telefoniko baten bidez erosleak abiarazitako ordainketa-eragiketak, saltegiaren gailu automatizaturen bat tartean denean (esate baterako, ahots interaktiboko erantzun bat), telefono bidezko eskari arruntak izango dira.
Tokenizatutako txartelarekin egindako Card-On-File (COF) eragiketak SCAtik salbuetsita daude saltokian erregistratzen direnean? ×+
Ez. COFak merkataritza elektronikoko eragiketen artean daude, eta SCA ezinbestekoa izango da, salbuespenen bat aplikatu daitekeen kasuetan izan ezik.
Orduan, COF eragiketak ez dira MIT eragiketak? ×+
Ez. COF eragiketetan, txartelaren titularrak erosketa-agindua abiarazten duen ekintza bat egiten du, esate baterako, ordaindu edo erosi aukeretan klik egitean. Nolanahi ere, eragiketa bat MIT izan dadin, ezinbestekoa da ordainketaren atzean bezeroaren agindurik ez egotea; bezeroa ez da bertan egon behar ordainketa agintzen denean. MITak zordunketen antzekoak dira, baina txartelen kontura eginak.
Merkataritza elektronikaren barruan dauden erosketetan, erosketa egiteko unean zenbatekoa zein den jakiterik ez badago, une horretan egindako SCAk balio al du erosketaren behin betiko zenbatekorako? ×+
Europako Banku Agintaritzak argitu du hala agindu-emaileak aurrez gehieneko zenbateko bat atxikitzeko baimena eman duenean nola aurrez baimen hori eman ez duen kasuetan, behin betiko zenbatekoa adostutako zenbatekoaren parekoa edo txikiagoa bada, eragiketa burutu daitekeela SCA berriro eskatu gabe; baina zenbatekoa handiagoa bada, jaulkitzaileak SCA eskatu edo eragiketa atzera bota beharko du.
Nola sar dezaket nire saltokia zerrenda zuri batean? ×+
Zerrenda zuria banku jaulkitzaileak gordetzen du, baina bezeroak sortzen du eta berak bakarrik alda dezake. Hori dela eta, Europako Banku Agintaritzak erabaki du banku jaulkitzaileek ezin diegula bezeroei saltoki berriak sartzeko edo saltokiak aldatzeko iradokizunik egin. Hala ere, saltokiak berak zuzenean jakinarazi diezaioke bezeroari aukera hori badagoela edo are zuzenean zerrendan sartzeko iradokizuna egin diezaioke. Dena dela, jaulkitzailearen ingurunean egin behar da zerrenda zurirako sarrera.
Nola jakin dezaket nire saltokia zerrenda zuri baten barruan dagoen? ×+
Legez, banku jaulkitzaileek ez diote zertan jakinarazi banku eskuratzaileari edo saltokiari zerrenda zuri baten barruan dauden ala ez. Informazio hori txartelaren titularraren berariazko baimenik gabe emateak datuen babeserako eskubidea urratu lezake. Nolanahi ere, saltokiak bere bezeroarengandik eskuratu dezake informazio hori.
Bestalde, eragiketa bati SCA eskatzeko azken erabakia banku jaulkitzaileak hartu behar du. Hortaz, arrisku-irizpideak aintzat hartuta, eragiketa bati SCA aplikatzea erabaki dezake, saltokia zerrenda zuriaren barruan badago ere.
